文/夏凡
最近，國泰航空出現高層「地震」，英籍行政總裁何杲、顧客及商務總裁盧家培雙雙請辭。何杲表示咁做係「對公司近月所面對的事件負責」。
同時，國泰航空原定於八月十八日係尖沙咀一酒店舉行嘅招聘都因為不可知嘅原因取消，仲未知下次招聘幾時舉行。
呢幾個月，國泰航空確實唔太平。七月廿三日國泰航空空乘工會呼籲去機場「搞事」，七月廿六日國泰航空機長利用機上廣播支持暴力示威，八月五日超過三千名國泰員工參與罷工，八月七日國泰將台灣同香港列係國家位置行為俾人爆出，仲有人指控國泰員工將香港警隊人員航班訊息PO上網……
飛機師、空乘人員都係人，都有自己嘅政治立場都觀點，想投身社會運動，呢啲野係個人權利，人人都應該尊重。但係，利用飛機廣播、利用職權，將自己嘅觀點強加到啲普通乘客頭上，唔係一個專業航空人員嘅表現。利用工作方便，將客戶嘅個人信息擺上網，就更加冇職業道德嘅行為。
香港航空點解做得好?係一流嘅管理，同細心嘅服務，「看來微不足道，都為你用心做好」。既然香港警隊人員可以付費坐你地班機，接受你地嘅服務，就係你地嘅顧客。你可以睇佢唔順眼，但冇人俾你權利將佢信息PO上網。
一連串嘅事件造成左巨大影響，中國民航局向國泰發出重大航空安全風險警示，指國泰近期多宗事件「暴露安全風險及隱患」，要求國泰禁止參與暴力衝擊嘅員工，執勤來往內地嘅航班，仲要交出所有飛往內地及經過內地空域嘅航班機組人員名單。
有人話咁係「政治清算」。查實人人都知，一間公司要去國外拓展業務，都會有一個本地化團隊，深入瞭解當地政策法律、風土人情嘅野。如果唔係，好容易有法律或者其他風險，甚至全盤戰略失敗。
國泰航空上個世紀40年代係上海成立，之後好快遷黎香港，不單只係內地有開展業務，仲有大量航線經過內地。成70年風風雨雨，點可能對香港，對中國內地嘅觀點、態度、立場、形勢，冇一啲啲瞭解?「搞搞陣」會觸怒內地，引火燒身，咁大間公司，冇諗過咩?
一面反對，一面用緊人地領空資源，賺緊人地啲錢，邊有咁著數先?做人要言行一致，你可以唔飛內地領空，唔搭內地乘客，唔去內地穩錢??講到明咪又係「利」字當前。
八月初開始國泰成為沽空目標，股價跌完又跌，一度跌到10年低點，十四日沽空額更創逾兩年新高，達到1.3億元。
損失咁多錢，仲唔喇喇聲採取行動?先炒飛機師，又發聲明話對不合法運動「零容忍」，最後行政總裁、商務總裁雙雙辭職。
利益當前，咩立場、咩觀點，都唔重要。大公司睇得好明，傷左就要退，一啲意見領袖都睇得好明，一有危險即刻走鬼去國外。咁你話，真正留低落黎面對香港終局，俾人當箭靶，當炮灰嘅，又係邊啲人呢?
責任編輯：張岩