林鄭月娥開開心心切蛋糕。
【文匯網訊】(香港文匯網 記者 龔學鳴)林鄭月娥自一月中宣佈參選特首選舉以來，一直同競選團隊「同行」，全力以赴做好選舉工程，最終取得勝利，團隊上下當然相當高興啦。尋日下晝，林太就舉行咗一場慶功宴，答謝團隊嘅努力同支持。林太切完蛋糕後，眾人就爭住同佢影相，場面非常熱鬧。
有林鄭團隊中人透露，林太尋日朝早同團隊成員食完早餐之後就到會展等睇點票，當宣佈佢當選後，團隊上下又要出席記者會，期間一直都冇時間食飯。直到下晝四點左右，團隊同候任特首辦傾完交接工作嘅安排後，大家就到君悅酒店會客室食下午茶，同時慶祝林太成功當選。
慶功宴場面熱鬧，出席嘅人士除咗有林太丈夫林兆波、大仔林節思、義工團成員外，仲有作為競選辦核心成員嘅「陳家班」，包括競選辦主任陳智思、副主任陳勇、陳念慈、陳清霞同陳振彬。其中，陳念慈仲興奮到攬住林太影相添。
責任編輯：高峰
