【文匯網訊】（香港文匯網記者 李慶全）古巨基一連五場《WE我們古巨基世界巡迴演唱會香港站特別版》14日晩尾場，雖曾於第二場發生墮台意外，但基仔一上台唱跳賣力，似已走出陰霾，但基仔坦言仍心存陰影，以後不可以有個窿在他後邊。
昨晚老闆楊受成夫婦、溫碧霞、張智霖夫婦、唐詩詠、森美、李克勤及羅力威等齊來撐場，基仔坐完時光機就笑着表示要離開中間位，再安全避開個大窿就笑說：「見過鬼怕黑，我見過嗰隻鬼都幾大隻，不過真係謝天謝地，死唔去，睬！係不幸中之大幸，我睇完醫生話可能會有後遺症，都幾長手尾，可能會好聲咗，跌一跌整個發聲系統好咗好多！」不過基仔指肩頸受了點傷，肌肉箍住了仍梗梗的。基仔憶述演出完去到醫院做各樣檢查：「我知道跌親背脊，pat pat腫咗好痛，醫生叫古太拉埋簾，我就拉低半個pat pat俾古太睇，她對我說：「瘀就冇瘀，不過有好多橙皮紋，我真想一個pat pat頂埋去，但開心老婆引我笑，所以我係個鍾意返屋企�H男人！」
鄭伊健擔任尾場嘉賓，他清唱一小段《一個為你甘去蹈火海的人》，全場反應熱烈，身穿黑色棒球褸的伊健才從LED牆中間出場，並與基仔一起合唱，更扮歌詞中「再度激烈擁吻」。伊健對基仔說：「在台下好感動，時光機不可帶回以前，但可以繼續製造美好回憶！」基仔則答謝伊健：「他除了做我嘉賓之外，也為我蹈火海，好似我上海開時裝騷，他來幫我做嘉賓模特兒，我老婆（Lorraine）間餅店出月餅，他在沙漠拍戲都拎住盒月餅話好好食，多謝鄭伊健，由我入行到拍第一套劇《笑看風雲》就看待他成哥哥。」基仔又選與伊健拍《笑看風雲》時的照片重演一次再拍照，基仔笑着問伊健：「點解要扯住我下面？仲好大力咁揪住？呢個係周星馳嗰個揸乜龍爪手？」伊健就澄清：「其實Benz雄（許紹雄）除咗佢條褲，我就幫佢𢭃一𢭃，你唔記得咗啦？你睇我嗰樣不顧一切皺曬皮都幫你𢭃住，費事你走光呀！」基仔笑答：「你都揪得幾用力，依家再影番張相，咁你幫我𢭃一𢭃啦，今日冇人𢭃過，快啲幫我𢭃！」引得全場觀眾爆笑。場面非常爆笑！之後伊健再多唱一首《友情歲月》，更走到台邊與觀眾握手。
到Encore環節前，發生了小插曲，基仔唱完《初心》熄燈落幕，可是左邊灰布幕卡著未能放下，觀眾看着基仔由工作人員扶落台及換吹氣大獅子布景。到基仔唱了最後一首歌《友共情》後觀眾仍不肯離開，基仔再以大會黑Tee上台，拿出手機玩自拍和拍片基仔再Encore《勁歌金曲》，演唱會於11時50分才正式劃上句號。
完成五場演出，基仔受訪笑言今次大步檻過，總算順利完成，本來醫生都叫他休息兩星期，但下一站19號於湛江舉行，他亦希望可以開Part 2。基仔墮台受傷，其實連日有手法治療師為他鬆弛肌肉，老婆Lorraine有幫手按摩？他笑說：「佢識鬼，剩係識笑我有橙皮紋，不過我跌低佢好驚，爸爸媽媽坐台下都好驚想衝入嚟！」
基仔憶述自己跌落大窿經過：「當時到我有知覺，是覺得閃了一嚇，一秒之後覺得背脊有嘢撻咗一撻，先意識到原來我跌咗，速度快到覺得痛就已經喺地下，不幸中之大幸我係背脊落地，但受猛烈撞擊，我係Chok住道氣，甚麼都慢咗又做唔到嘢，工作人員叫我唔好郁唔知傷咗邊度，等到聖約翰救傷隊來到摸我啲手腳問有冇感覺，又叫我捉一捉佢哋隻手睇嚇有冇力，就開始慢慢覺得手腳各樣都OK，只係覺得背肌肉痛，頸就chok到痛，唔係最嚴重嗰心都定咗，但我都起唔到身。」基仔指當時有人提議停騷，到他抖順條氣，知自己沒撞到個頭就想繼續唱下去：「於是我試郁嚇啲手腳，為時都十幾分鐘，之後就升我上去，我就一路摸頭摸頸，好彩檢查後冇骨裂。」跌下後有否見到老婆，她是否驚到喊？基仔說：「冇見到，根本見唔到邊個喺隔離，我係上去唱埋首歌降落台換衫先見到，都冇擁抱，當時心情係show must go on，因為好多人等咗好多年，有啲又係外邊飛嚟！」他表示太太陪陪他看完醫生知道骨沒受傷已很安心，演出期間就服用止痛藥及放鬆肌肉藥，讓他睡得好一點。
談到昨晚再發生拉不下布幕的小插曲，基仔笑說：「對比起自己單好小事，我已經睇透咗，大難不死必有後福，每晚返到屋企都同老婆講其實係好好好好彩，如果係頭、手就最嚴重，我冇練頸肌肉，我硬頸啲就好啦！」基仔又答謝大家關心，不過坦言意外後令他留下陰影：「見到咁大隻鬼我怕黑，其實係自己疏忽咗程序，因為加場只可加在前面，綵排時間就少咗，我又對自己記性太有自信。」湛江一站會否移開窿窿？他笑說：「我會鼠開啲，以後都唔會畀啲窿喺我後面，要眼見個窿！」
責任編輯：遠航