【文匯網訊】（記者 何西）公民黨譚文豪噚日喺facebook轉載新聞，本身係想寸建制派議員謝偉俊最多次缺席投票，仲大大隻字咁話「選佢入嚟缺席」。點知呢個回力鏢，一下就掟中自己兩個豬隊友，分別係缺度投票次數排名第二嘅工黨張超雄同第三嘅民主黨黃碧雲，而「選佢入嚟棄權」嘅前三名議員更全部都係民主黨嘅人。做佢同路人真係幾咁傷呢。
譚文豪噚日喺facebook分享新聞，批評謝偉俊以128次缺席投票嘅記錄，位列「最多缺席投票議員」之首，又標籤（hashtag）「最無用議員」，「都唔知選佢入嚟做咩」。但同一篇新聞之後就講到，張超雄同黃碧雲緊隨其後，分別以125次及116次缺席投票，位列第二名及第三名。至於有出席、但就冇投票，又或者投棄權票嘅議員方面，民主黨許智峯就成為冠軍。淨計棄權票，投得最多嘅頭三個議員，全部都係民主黨成員，其餘包括林卓廷與鄺俊宇。咁樣打同路人，唔知有冇人覺得佢係鬼呢？
責任編輯：夏凡