【文匯網訊】大公文匯全媒體報道：每逢選舉，攬炒派例必上演鬼打鬼!所謂的「初選」噚日最後一日投票，本土派揚言要踢走民主黨現任立法會九龍西議員黃碧雲(一嚿雲)。前學聯副秘書長、參選超區嘅岑敖暉為九龍西參選人張崑陽拉票時，率先狙擊一嚿雲係「妥協派」;「本土派」九龍西候選人劉澤鋒亦喺擺街站時不斷攻擊一嚿雲，話佢冇簽「初選聲明」、選舉先嚟「抗爭同支援」，唔係真正嘅「抗爭者」。喺深水埗元州邨利瀚庭議辦個「初選」票站外，噚日亦有義工公然叫市民唔好投畀一嚿雲同毛孟靜。就連黨友九龍城區議員黃國桐都高調支持參選九龍西嘅「本土派」馮達浚，而唔支持一嚿雲。
黃碧雲選情告急，叫埋黨主席胡志偉同黨友涂謹申為佢站台。不過「港獨」分子劉頴匡就再踩多腳話︰「唔好浪費選票畀無勝算既(嘅)候選人了，集中票源，全投『抗爭派』!」商人簡浩名亦喺fb話，如果一嚿雲贏咗「初選」，就要爆佢料㖭!
責任編輯：Iris