【文匯網訊】據點新聞報道，梁頌恆、游蕙禎喪失議員資格，青年新政變廢青新政，無得撈啦，咁可以打咩工呢?《明報》尋日就出咗佢哋兩個嘅專訪，游蕙禎透露，話佢媽媽呢幾日都叫佢去搵工，雖然佢無講到咁白，話香港地無人再願意請佢哋兩個，但問題係香港仲有人會請佢哋咩?佢媽媽仲鬧佢，點解佢講嘢唔經大腦，宣誓時要辱華。花心恆就話，未諗到會做咩工，亦都想像唔到有咩人會請佢。真係早知今日又何必當初呢?
至於辦公室入邊好多酒樽，梁頌恆竟然話，因為要用酒精減壓喎!不過酒樽都無得留低，因為梁游被下令尋日下晝五點前收拾細軟，遷出立法會大樓。記者上立法會十樓睇過，大約三點幾，大隊人馬就由辦公室走晒出嚟，有人孭住大聲公，又有人推手推車將大堆紙箱同一袋袋雜物帶走，有影印機、垃圾桶咁，聽行家講，來來回回都有幾十程手推車咁多嘢。
話說記者上十樓嘅時候一出電梯真係當堂嚇咗一跳。幫手搬走電腦櫈嘅搬運工人竟然將手術口罩剪開兩個窿當面罩蒙面， 好似一齣日本卡通嘅蒙面主角囉。梁游兩人就無親自出馬執包袱走，不過派出咗多名助理同青政成員，好似青政前發言人黃俊傑、一直支持「本土派」嘅港大學生會前會長馮敬恩都有現身，又係戴晒口罩，不過都一樣咁易認。點仔想問下，其實佢哋係咪真係特別鍾意口罩，定係大家呢排都中招惹到傳染病呢?
責任編輯：星空
