【文匯網訊】（記者 陳川）社民連大佬長毛梁國雄，連月喺街站貼咗大大張劉曉波遺孀劉霞嘅相，相下面就擺個籌款箱，咁係人都以為佢係幫劉霞籌款，結果劉霞去咗德國，有人問啲錢幾時送去畀劉霞時，長毛竟然話自己從未講過係幫劉霞籌款喎，當然俾人鬧到爆啦！不過，佢近日就繼續以呢種誤導手法籌錢，完美演繹咩叫人無恥就無敵。
五短人寸鬧者「五毛」
長毛之前借劉霞名義嚟籌錢，結果筆錢原來係用喺社民連，即係佢自己身上，結果惹來市民唾罵，但佢面皮厚過咩，當然唔理仲要繼續籌啦，仲大大聲講從來冇講過係幫劉霞籌款。社民連副主席五短人（黃浩銘），同佢大佬當然一擔擔，俾人追問同一問題時索性答都唔答，貼張相嚟話追問嘅人係「五毛」，盡其「民主」素養。
林非就喺fb發咗社民連針對網友追問嘅「官方回應」，同埋五短人張「五毛圖」，然後用周星馳電影《回魂夜》的金句揶揄社民連：「七孔流血還七孔流血，死還死。聲援劉霞還聲援劉霞，錢還錢，兩回事嚟的。」
「神駒」批賊性難改
近日，可能見劉霞已經冇號召力，就換個名堂，將橫額改為紀念劉曉波逝世一周年，仲喺前日搞「紀念活動」，當然重點繼續係幫自己籌錢啦！「無敵神駒」仇思達就發帖批評：「社民連真是賊性難改，被市民唾罵呃錢，還膽敢繼續消費劉曉波。既然長毛賊梁國雄宣稱，『從來無話幫劉霞籌款』，咁呢啲捐款箱係為誰而籌？難道是為劉曉波嗎？真無恥！」
唔少網民留言鬧爆。「Leo Leung」道：「佢都算賤，個人都死咗都仲用佢個名嚟籌錢。」「Spencer Tse」揶揄：「都無恥開，唔差在無恥到底。」「Takki Ma」就幫長毛諗埋口號：「支持劉曉波，籌款養毛哥，咁就減少歧義，唔會有市民以為d（啲）錢係轉交出去啦。」
責任編輯：喬一