【文匯網訊】(香港文匯網記者 甘瑜、文根茂)𠵱家要創造新嘅文字風格，唔需要文學造詣，例如民主黨鄺俊宇就因為亂用逗號創造出「鄺體」，而油尖旺區議員陳梓維就因為唔識字而創下「梓維體」。陳梓維日前接受《蘋果日報》訪問，成段訪問片段可以話係全方位咁展示出佢嘅無能，直到最後要佢寫「逆轉」兩隻字時，佢先用語音打咗個字出嚟，睇完依然寫錯晒兩個字(圖)，俾人揶揄呢啲字叫「梓維體」。唔少人亦都開始學佢亂寫字去各抒己見，例如以「找直必拲熹尔(我真心恭喜你)」，去恥笑班投票畀佢嘅選民囉。
陳梓維（圓圖）靠手機語音識別「逆轉」兩字怎樣寫仍然寫錯，令人無言
《蘋果》嗰段近18分鐘嘅訪問片，有人形容睇咗7分鐘都覺得浪費生命，事關陳梓維開會帶漏嘢，申報選舉經費印漏嘢，連開區議會發言時都要隔籬個議員陳嘉朗幫佢撳着支咪，英文發言要幫佢翻譯，而佢開口就係咁問印宣傳海報3,000張每張要3蚊係咪太貴，搞到陳嘉朗都要提佢，印3,000張同2,000張分別唔大，咁追落去冇意思。
同《蘋果》記者鬥唔識
段片嘅最後，記者請陳梓維寫低「逆轉佐敦南」5個字，陳梓維問︰「『轉』係『轉向』個『轉』吖嘛?」然後再向手機讀出「逆轉」兩隻字，想透過語音打字睇吓點寫，點知結果兩隻字都依然寫錯晒。佢仲問記者︰「我有冇寫錯啊?」個《蘋果》記者竟然只係話︰「個『逆』字寫錯」，睇唔到個「轉」字都係錯嘅，其實係咪鬥唔識字?
黃敬業「恭喜」選民
講真，會考0分、毅進肥佬，大家對陳梓維已經冇乜期望，只係冇諗過真係咁差。網名「陳到」嘅「熱狗」黃敬業亦分享咗嗰段片嘅幾張截圖，登特錯字地揶揄道︰「佑(佐)郭(敦)南的居民有福了。你們要好好扶持陳議員呀。」再加上「香港人叻(加)油」、「五大拆(訴)求」、「決(缺)一不可」等標籤去補刀。「Ivan Tam」就潤班投票畀陳梓維嘅選民話︰「找直必拲熹尔(我真心恭喜你)。」
網上仲有好多討論，仲令人諗起佢只收中文CV(履歷表)，唔收英文CV一事。「Ho Nam Leung」話︰「好×癲，真係文盲黎(嚟)，仲話要收中文cv，口述cv算啦。」「Walter Kovacs」形容︰「寫中文履歷俾(畀)佢都係歧視。」「Wong Ka Hei」話︰「小意思啦，都係錯兩個字姐(啫)，雖然佢只係寫左(咗)兩個字。」「陳雪」反問︰「文盲?」「陳到」抽水謂︰「心盲。我講選民。」
網民：盲撐「黃」惡果
「Chin Fung Felix Pang」就概括︰「呢個就係『黃色經濟圈』既(嘅)問題，你唔理佢智障好，文盲好。一句『五大訴求』就屎都照食。報應就係所有買賣，包括政治人材(才)亦一樣。只會越黎(嚟)越低質。」佢又話，唔係歧視學歷低，但有啲嘢低學歷同文盲真係做唔到，「從政，需要人文教育。有D(啲)野(嘢)係必須知，你起碼要讀懂-Sociology Political Science(社會學政治學)。這是從政所有人的基本知識。唔係只會貽笑大方。」
唔明外籍警官發言 要搵「人肉翻譯機」
■英國籍總警司韋能治。資料圖片
陳梓維日前喺油尖旺區議會亮相，但就不停出醜。先係「傳單」、「海報」傻傻分不清楚，又係咁質疑3蚊一張海報太貴，建議做貴多唔知幾多倍嘅電視廣告，呢種「何不食肉糜」嘅思維，即刻令人質疑佢一啲常識都冇。慘事仲未完，當日現場仲有警隊旺角區指揮官，英國籍總警司韋能治嘅英語講話，搞到旁邊嘅議員要做埋翻譯𠻹，唔知遇到呢個困難嘅陳議員會唔會覺得係指揮官「自我為中心」，用英文講嘢有啲「不足」呢?
因手寫政綱、毅進肥佬、喺facebook專頁「放閃」、唔識英文、一度話聘請議助要學歷低過自己等，陳梓維近日都係網上熱議人物。日前嘅區議會會議更見佢「優秀」一面，佢好積極咁發言，好「敏銳」咁質疑人哋提出嘅撥款項目，但就好快速咁暴露咗囥|未分清乜係「傳單」、乜係「海報」，同時又計唔清楚「3蚊一張嘅傳單太貴」同「電視廣告」究竟邊個貴嘅代議士水平。
fb專頁「關心」英語水平
對市民嚟講，都係關心佢係唔係有為市民、社區做嘢，但去到陳梓維呢度，大家好似仲關心佢嘅英文水平有冇提高，甚至有網友專登為佢開咗個「每天關心陳梓維學習英語狀況」嘅專頁，不過恐怕陳議員要叫大家失望。
喺首次區議會會議上，陳梓維唔好彩遇到韋能治就太子花墟年宵的交通安排作講解。陳梓維拿拿聲戴上即時傳譯耳機，不過唔知係唔係翻譯太「自我為中心」，未能照顧到陳議員嘅程度，佢好快就取下耳機專心玩手機。
其實，聽唔聽得明會議內容，對陳梓維嚟講根本唔緊要。去到之後，佢索性忠於自己，離開呢個令佢尷尬嘅會議室，直接接受《蘋果日報》訪問爭版位𠻹。
責任編輯：林犀