一批「本土」後生仔近日猛鬧泛民議員在議會上唔夠「勇武」，唔衝又唔郁，認為他們應讓位給「身強力壯」的「素人」入立法會。圖為攬炒派議員上周五於立法會內務委員會會議上再拉布，一度引起混亂，企圖癱瘓立會。 資料圖片
【文匯網訊】差唔多7個月嘅立法會內務委員會亂局以攬炒派敗走離場告終，現一班場外嘅「本土」後生仔猛鬧攬炒派舊電池唔夠「勇武」，唔衝又唔郁，只識開直播同Call白車，應該讓位畀場外「身強力壯」嘅「素人」入立法會「打交」喎。舊電池嘅支持者就反唇相譏，話你班友咪又係得把口！前特首梁振英就篤爆話，工黨劉小麗、公民黨余德寶、「素人」區議員李傲然都要含淚棄選，民主黨老鬼黃碧雲卻能順利入閘，顯示攬炒派完全無意將議席讓畀「焦土派」，而「35+」嘅「奪權計劃」更冇預「焦土派」份，只係借膊頭畀「老泛民」繼續霸位唔放啫。
■「獨人」劉頴匡發長文表達不滿，指議會已 無可能再斯文，要選「衝得、砌得、唔怕付上 任何代價的議員」。 fb截圖
經上周五一役，「獨人」劉頴匡率先表達不滿，喺facebook發長文話議會已無可能再斯文，要選「衝得、砌得、唔怕付上任何代價的議員」，待「光復香港」之時，再將議會「還給」擅長論政嘅「社會賢達」喎。
香港立法會內委會8日改由建制派議員主持會議，泛民議員不滿並阻撓會議進行。圖為泛民議員陳志全被建制 議員單手強行拖走。資料圖：「中央社」
曾涉圍堵機場同襲擊付國豪案件嘅邱文勁亦好嬲，仲踢爆有攬炒派中人放料︰「曾建議（公民黨）郭榮鏗與（現任主席）李慧琼鬥搶主席位，郭抗拒，認為『爭櫈仔難看』，他亦不希望被趕走，因他要『主持會議』。」
「立場姐姐」何桂藍則不滿攬炒派坐定定甚至離場。屯門區議員黃丹晴亦寸冇人幫「慢必」陳志全。《學苑》前副總編輯陳雅明就話，攬炒派唔夠「勇武」，個個喺立法會會議上開Live，直情變成「YouTuber」，已經唔適合坐喺議員嘅位置。
馮達浚批攬炒派有份製「困局」
馮達浚翻舊賬稱，攬炒派都有份造成內會 「困局」。 馮達浚fb截圖
有意出戰立法會九龍西直選嘅馮達浚翻舊賬，稱攬炒派亦有份造成內會「困局」，原因係2011年修改議事規則嗰陣，何俊仁、劉慧卿、梁家傑、陳淑莊等都有份贊成主持會議嘅主席有權趕人離場，𠵱家只可以話係自作孽，仲叫攬炒派「練體能」。
網媒「輔仁媒體」總編輯容樂其引用咗「KEVIN CHENG PHOTOGRAPHY」嘅「意見」：「今次立會之戰，泛民真係企得好硬！企咗粒幾兩粒鐘，都仲係企係（喺）到（度）。勇武到（度）呢！」
健吾恥笑：選腳架入去咪算囉
原名葉鍵濠嘅商台節目主持健吾就引用咗「Indistinct chatter」嘅恥笑：「×，我選個腳架入去咪算囉！」佢仲話：「強烈要求初選加入健美、泳裝環節，無腹肌者，一票不投。」
攬炒派食花生 直播玩「碰瓷」
自稱「焦土派」嘅「無神論者的巴別塔」，為攬炒派喺內會嘅表演打出「87（白癡的諧音）分」，仲話「不能再高了」。佢力數攬炒派老嘢幾宗罪，一係冇同李慧琼爭主席位、二係做演員都唔落力，全部拎手機直播而唔「抗爭」。
佢仲點名醫學界議員陳沛然拎住件黃衫話自己係救護員，坐定定喺位食花生，尹兆堅「碰瓷式」抗爭，勇到咁上下就瞓低Call白車。最後集體離場更有「夠鐘收工食Tea」嘅感覺。佢又話，好似梁繼昌「全程呆坐」、尹兆堅郁啲就傷嘅攬炒派，下屆就咪再選，留返畀啲體魄強健、有晒心理準備會響議會入面打大交嘅人取而代之。講到咁白，其實都係講緊議席再分配啫。
被黑暴逼表態 傳統攬炒派自食惡果
唔割席？為咗爭票，攬炒派乜都做得出啦。一眾攬炒派為咗喺初選勝出，各個不惜踩住「兄弟」上，你話我語言偽術，隨時轉軚，我話你講大話，顛倒黑白，𠵱家愈來愈多人出來抽水，真係「兄弟爬山，各有各『努力』」。傳統攬炒派被自己一手扶持嘅極端分子搞到進退兩難，咁嘅下場怪得邊個呢？利用咗人哋，𠵱家想甩身，邊有咁易呀。
喺區選落選嘅鄒家成日前喺facebook爆料，提出將「『會積極』運用基本法賦予立法會的權力，包括否決財政預算案，迫使特首回應『五大訴求』......」中嘅字眼，改為「『會』運用......」，但俾白鴿黨同某啲參選人反對。
想參選者借勢打擊鴿黨
之後白鴿黨代表陳旭明又發文反擊，話提出要留「共同綱領『彈性』」嘅係白鴿黨前副主席沙田區區議員李永成，引爆罵戰。
見狀，一眾有意參加今年立法會九龍西選舉嘅其他攬炒派中人自然借勢打擊鴿黨。學聯代表會前副主席、「港獨」分子劉澤鋒，「半島連線召集人」馮達浚、「香港大專學界國際事務代表團」前發言人張崑陽都加入戰場，紛紛高調表態支持鄒家成提議。
劉澤鋒仲標籤埋其他「潛在九西候選人」，包括白鴿黨黃碧雲、曾襲警罪成嘅九龍城區議員曾健超、攬炒派深水埗區議員劉偉聰、連契媽「議會陣線」毛孟靜等都唔放過，逼佢哋表明自己都對「攬炒」唔留「彈性」。
民協深水埗區議員何啟明就出帖話，支持鄒家成嘅建議。
攬炒派內訌，早就見怪不怪，只係傳統攬炒派今次被逼成咁就完全係自作自受，自己一手搞起黑暴，為咗一時利益抱團取暖，扶班極端分子上台，𠵱家被反咬一口，進退兩難，只好怪自己囉。
責任編輯：咩白